Musa inapercazable.

Semos augua mirando de beber-nos

estando galochos de esferens bersáns,

chirlas de plebia ent´alcuentro

en l´azar esbarizoso d´as  finestras,

simién de trestallaus mars, ibons,

fontanetas de concaradas costeras,

anguziosas luengas laminando

con bersos gleras de lexanas riberas,

carizia de paisaches calizos, barranqueras t´o bazio,

abozinau continar, cadagún i semos un camín. 

Con tot e con ixo, dica do pleguen

as mias casalizas alas de corral

o mio percutiu bolito de perdigana

encara soi capable de debantar,

y si maitín no puedo ya adubir-te,

u te deluyes en atras auguas,

u o fuego ye un día de royo celofán,

alzaré o amagau arguello de una

enarcada nafra de bida ubierta,

mesmo istas parolas, a la usma d´a tuya baya,

que mai estioron un prexinau chuego floral. 

Luego t´acorarás dixándome

un quedo fumiar de recosiros,

m´enfilaré cara t´atros  atardexers

an a dulzura menaze menos feroz,

e soxetaré o ramal d´a mia guita

parola esnabesando mugas ta yo inapercazables,

xublidarè, a la fin, a tuya entrefilada complizidát,

y aturaré d´encorrer-te con o corte amolau d´os mios bersos,

ni brenca de tu aspero, sólo que os mios bersos podié ofrir-te. 

Reblaré en iste prexinar-te y no remanirá que o berso,

rimallo zanzero, zenisa purniando d´o que un dia,

musa inapercazable, en yo, sin de remeyo,  esties. 

Musas en ta par de l´aire, dulze abatane de poetas

culpables de bohemia, en o goyoso enzerrine inacorable de,

sin garra alufra, como diosas prexinar-bos.