Qui replega os tuyos suenios cutianos…?
Bolito de enreligatas fuellas de laurelero que
o pulso de tu merexe por batir a marca d´o
tiempo en os tuyos esbeiles,
cheras esconditas do prexinar-ie o
que o prebeyible d´o día acora,
falordias que ya dengún no, de mentiretas,
te rezenta p´amostrar-te a bolar,
puntos de fuga, cuentraluzes acorporandose
dezaga de grisas berruntas .
Suenios… Yo
mesmo no los rispero en trata
e como cal, e
tasamén, m´en queda, a punto lo día,
una
esfilorchada baya de libertat azulenca, una
golladeta que
me se mira dende luen, una remor de paz ,
una
sinsustanziata erezión pa cosa…alasbezes un embordiello
de prexinallos,
como de eszenas proyetaudas a botiboleyo
en as mías
pardas alas de pola a lo retuno de una
bombilla.
Suenios…
fruitos zaga os tuyos güellos que a
nuei madura
pa laminar
d´ers o suyo dulzor d´estrela, fruitos
nueitámbulos
que o mal zaba con o suyo esmolato filo
fendo-ne
cullebras de amarga pelleta, fruitos malmesos de
foscos recosiros uscando a maitinada que empreñe de
berde
a suya negra
simién…
A nuei ye un
mar de suenios do s´amagan afrechos d´estadistas,
sicologos,
poetas e publicistas.
Mañana o parte
d´as notizias fablará de grandizos suenios,
o de culos e a
o rabés será: D´os suenios d´os grans,
gestatos en o
sondormir de buena cosa de chen…ni en os articlos
de opinión, ni
sisquiá en a pachina an mos i- meten qui ya ye
goyoso en o
suyo suenio pa cutio, trobarás : Güe he
soniato
con tu…
E asinas, como
ye de dar, denguna zerteza i-tendrá mans que
t´en faigan
fiestetas por os aintros, y todos seremos sin tartir
en o silenzio que
mos aponderen os bendedors de suenios de
esibizión -masa
de suenios en masa- en os enluzernáns brilos
doratos d´o día.
Asina que ya
lo´n sabes, que fateza, güe
tanimientres os
melons cruzaban a carretera,
zarratos, por
no beyer-la, os güellos a la nuei,
en a mia intimidat de amagatas esenzias…Güe
he soniato con
tu…
Pa dizir-te isto se abioron de soniar os poemas.
Te usco en os mios suenios… mos beyemos en o
firmamento
de ista eterea unibersal filmografía. Qui quiera que
sigas…
