lunes, 31 de octubre de 2016



Totz os mios agradeximientos pa o Conzello de Biscarrrués por emparar l'aragonés con iniciativas asabelas que mahas como lo consurso de xotas d'a Galliguera en luenga aragonesa y castellana. Tamién a o grupo de Xota d'Ayerbe Santa Leticia que facioron posible ixoriar as cantas como cal . Gracias a las suyas armonías y voces lo pasemos de bitibomba ascuitan-do-lis

 Xota y luenga aragonesa chuntas d'a man, fendo-ie expresión prou funda que entre totz aduyamos a enamplar . Porque si no ye entre totz n'on saldremos.

Gracias tamién a o churau por dar-me o premio que me fació muitismo goyo. Estoy que no teneba guaire "competencia"asinas que a veyer si en atras edicions se i-presentan más treballos.

Atamás d'as aduyas publicas pa empentar l'aragones éste ya no faría garras. Manimenos enchaquias como esta, sin guaire presupuesto, aduyan muito a fer l'aragonés más vistero y cercano.

Xisquiá que la xota s'alcuerde d'esta luenga a la que tanta voz  le fa falta y que l'aragonés tresmine as suyas trazas en todas as expresions normalizatas d'esta tierra aragonesa.      

Gracias Lola por o vuestro cariño y buen implaz.

Coplas n'aragonés presentadas t'o concurso -Biscarrués 2016-:
Iindice :
A- Coplas pa aponderar l’aragonés :
1.        Bien Alzada.
2.       A mosica d’as parolas.
3.       Parolas retunas.
4.       Ixoriando musas.
5.        Xota d’atro estilo.
6.       Luenga aragonesa.
B- Coplas pa festejar :
1.        Petalos de rosa.
2.       O periglo d’o tuyo mirar.
3.       Enarcau
4.       A victoria d’o verso.
5.        O firmamento d’os tuyos huellos
6.       Más polida que no creyes.
7.      O vin d’a tuya risa.

Locales
C-Coplas  de casa Ferrero d’A penya, y redolada nuestra :
1.        Enta Buenos Aires. Xota tanguiada.
2.       Sirenas de Zaragoza .( Plg. Industrial).
3.       Os ferreros d’A penya.
4.       O violín en a era Ger.
5.        Tunel ferroviario de Carcavilla.
6.       Naxidas de Salinas Viello.
7.        Foz d’Escalete.
                             D- Coplas de Galliguera, Penyas de Riglos, Soduruel :
1.        Puen d’a Gorgocha.
2.       Mosquito ‘ blues.
3.       Agosto s’en fue. Dondiando por  Centenero.
4.       Pegallo Carretera A-1215 ( Chaca- Santa María).
5.        O canfranero.
6.       Lindano, Que fer?
7.        Pa Biscarrués. ( Y toda la redolada).
8.       Despedida.

A - COPLAS ADEDICADAS A L’ARAGONÉS.      TRESTALLO DE 6 COPLAS.

1.A     Bien alzada.
bien alzada la deixón
en a voz mia tos la baixo
a luenga d’Aragón.

2.A     A mosica d’as parolas.

D’estas parolas nuestras
qui fa callar la mosica
no ye pas o tiempo,no
que ye qui no siente mica.

3.A     Parolas retunas.

Bombolletas tortulando
atamás de bells petando
si a l’aragonés l’enristen
mi voz firme gorgollando.

4.A     Ixoriando musas.

As mias musetas quereban
a escondecucas chugar
yo firme encorrer-las pa 
poder-las escurruchar.

5.A    Xota d’atro estilo.

Enflascaus, terne que terne
cuan as xotas se sintioron
que si manyo, que si Espanya
no más d’ixas fación.

6.A     Luenga aragonesa.

Quan me dices que pa qué
quemexió qué contestar-te
pos que Aragón ye buen pueblo
esta luenga su estandarte.

B- COPLAS PA FESTEJAR ( Y CARRIAR BROZA ).      TRESTALLO DE 7 COPLAS.

1-B     Petalos de rosa.
A saber-lo qué contento
meto versos pa la xota
fer volar a lo mio canto
como petalos de rosa.

2-B     O periglo d’o tuyo mirar.

Campaba yo por mi vida
nos encertemos trobar
ya muit tardi paré cuenta
o que ibas fer-me plorar.

3-B     Enarcau.

Miaquemesió si lo yera
holio si lo parixeba
enamorar-me de viello
o mesmo que quan podeba.

4-B     A victoria d’o verso.

Ormino en o peito os querers
cosetas te dixarán
a victoria de unos versos
que t’amorosiarán.

5-B     O firmamento d’os tuyos huellos.   

Baxo d’o brilo d’o cielo
i contimparaba estrelas
bin’-eba tantas o más
purniando-te n’as ninetas.

6-B     Más polida que no creyes.

Resalada y berolleta
que fácil que fas rimar
más polida que no creyes
perigloso tu mirar.
   
7-B      O vin d’a tuya risa.

Dixa-me fer-te fatezas
sanseladas y comedias
esbotar d’a tuya boca
a garona de tus risas.


que un poquet d’o que’ll yera
en Riglos quedó su almeta
mesmo un matizo de yedra.

2-C     Sirenas de Zaragoza. Polg. Industrial.

Ta l’Actur s’en baxó
entre cantos de sirena
a navegar-se ixa mar
pero a mar ya no bi-yera.


3-C     Os de ferrero d’A Penya.

Ta Riglos de nueitz marchaban
a punto día plegaban
quan pisón s’encendeba
mallos y fierros purniaban.

4-C     O violín en a era Ger.

A truca un kilo de pan
en Yeste o violín crompó
d’a coda la yegüa Jarne
de mosica a era vistió.

5-C     Tunel ferroviario de Carcavilla.

Deixa en o cabo lo túnel
bafo a buxo a’l baixar
uloro malas lo veigo
a espígol a’l tornar.

6-C     Naxidas de Salinas Viello.

Cinco chirmanas que yeran
todas de Salinas Viello
a l’arreu marchón ta USA
encá que cueste creyerlo.

7-C     Foz d’Escalete.

No quiero ser niquitoso
contimparando entre anviestas
alufra dende escalete
y ya dicirás que piensas.




D - GALLIGUERA, PENYAS DE RIGLOS, SODURUEL.     TRESTALLO DE 8 COPLAS.

Bi-ha un puent con os suyos huellos
de glarimas engaronaus
porque le furtón os cielos.

2-D     Mosquito ‘ blues.

O Galligo lo aturoron
ta part d’a val de Triste
do ató lo macho l’amo
d’o progreso que enriste.

3-D     Agosto s’en fue. Dondiando por Centenero.

En agüerro Soduruel
que caricacho se i queda..
soledat muit preta y funda
aspra zoca d’almendrera.

4-D    Pegallo Carretera A-1215 ( Chaca- Santa María).
Dice, AMil doscientos quince
“si te vienes no conduzcas”
mirar ya d’acotraciarla
no chuguetz a escondecucas.

5-D     O canfranero.

Por os planos y montanyas
fendo los fierros tinglar
o canfranero chuflando
cutio firme traquetiar.



6-D     Lindano, Que fer?

Ostia que esferra zagal
Galligo rei d’a val
no baixa guaire fortal
que o lindano le fa mal.

7-D     Pa Biscarrués. ( Y toda la redolada).

Fa firme honra pa esta luenga
esta chent de Biscarrués
metendo-nos cantareta
“xotiar” n’aragonés.

8-D     Despedida.

Como a luna en Tolosana
me fa goyo despedir-me
en silencio china chana

acucuto dimpués d’irme.

lunes, 29 de agosto de 2016

Antonier-Soduruel.

Resultado de imagen de cordero
Antonier (Cronica d'una acronía en una d'as vals de Soduruel).

Qualques ovellas correban o restollo radendo d'a tierra as bien pocas brancas verdas que agosto no heba puesto sumanciar. O restollo,- fumiando  polvo blanco, zafumau de luz rusient d'oro-, no yera que un piacet de mirallo encendiu do se miraba fito-fito lo sol.
A tarde tot l'empliba d'un espacio bien platero de claridat a caramuello solo mascarau por ixa soledat  preta y funda que se clava en o paisache y en a gargamela de qui se queda. Ixa soledat con o retrai d’una viella zoca d'almendrera bien enradigada, ixe tocón renegriu y terne en que a ormino se trepuza.
La envista gosaba querer recontar-me un mensache viello que me reculliba dende a suya uellada antiga. A escuitetas yo sentiba os sinyals que s'amagan en as piedras, en as botinadas  d'aire que pareixeba esbotar-se dende as tripas gorgollosas d'a tierra, en o mormor d'as cicalas... y a la fín en a figura d'Antonio... largo como yera en a mosquera.
As quatro crabas que teneba, morriando marguins u arrepinchadas a o canto d'as barzas cuentra lo fundo azul d'a tarde, guallardas, se me miraban a traviés d'as suyas inquietants ninetas de cascabillo vuedo. No en teneba más , ixe yera o suyo rabanyo que cudiaba con o conque de continar estando o que yera. A resta d'o ganau ya se l'heba sacau, qué hoder…que ya no adubiba a calzoniar pa tantas.
Antonier –Zarrapico le deciban porque yera chicorrón- , o viello pastor d'Anzanigo, dormiba chitau en una marguin de l'esbarre de Centenero con un corderet  acoflau entre as suyas mans de chinebro.
Aturau por os cans, o tiempo que tot l'enceta, l'heba acorau  un día sin atro mientres uitanta y tantos hibiernos y agora lo convoyaba y amorosiaba con garrampetas de lana blanca.
L'alda teneba plena de vida, blanca y tova, renovada… igual que una mai.…. Cuenta tu qué preixinallos podrían amprar-le os suenios baixo a gorreta verda de jondere. Estoi que gosaba dondiar barafundiando bien frescacho por atros leitos marinos encara por sulsir. Suenios a rebutir d'algas, caracolas, conchetas y carapazons fartos d'augua, sin res d'o polvo d'as de piedra que s'en trobaba por os camins. (Araba, no se creyeba con tot y con ixo, que a suya redolada estió mar).
En ixe mesmo inte dillá d’a zaguera envista qualques mundos enlá, as olas d'a mar terne sobateban as zagueras rallas y cinglas firme enreligadas ya con l'alma d'o mar.
Qué alpartau que yera lo mundo con os suyos lunes y os suyos mares. 
Soduruel, que bien cerqueta yeranos d'Ena, lo croxiraba y d’as suyas mans entreveradas , verde y soro, tierra y cielo redamaban a suya desinforme mosta de silencio rasinoso. Tot i consonaba sin que dengún en parase cuenta.
Astí lo deixé, m'en fue en un adiós que s'estirazaba sin crebar-se mica…
Antonier  yera enrestindo lo tiempo… soniando-se glera salobrenca debant d’un estranyo ociano prexinau. Debeba d'estar un mar gorgolloso, esgargallando esbruma blanca cuentra lo suyo peito pirinenco, muga bien pincha  amerada de tierra y mar .
Dimpués, quan s'espertase repropiando morra la mar, escurruchando a bota, a gargalet veyería atra vegada nantar, bien mandau por o tiempo, lo sol. 

Pero agora o tiempo, feba ya ratos que ya no bi-yera.

O corderet, que se lo miraba calmudo, se chipió de yodo y de sal.

jueves, 18 de agosto de 2016

Ya parixe que reviscola.

Fará buen fascal de días que no me posaba  a escribir en este blog …holio si en farán. Ni sisquiá he gosau ubrir este blog que agora parixe en as tres pedretas meyo amortau de mal zaguero. No sé si l’he muerto pero a lo menos bien sarrenau que li dixau por no comboyar-lo como cal. Más vale que estoy que dengún ita a faltar nuevas entradas, porque a ta más mía ya se hubiera rinchau de asperar-las .
 De cuan en vez me ha dau a fumada d’acotolar-lo de raso y sacar-lo de este embordiello tan revisalsero que ye internet. Y es que cuan me meto a leyer os poemas en aragonés  que fui calando, me meto un poquet mantudo porque me pienso que tenié muita barra pa amostrar-los asinas, a la mía traza, en basto y sin o grau de aragonés que caldría auto-exigir-me. No…si a delera ya yera buena ya ,y encara millor o sentimiento que m’empuxó a barafundiar de firme…pero as trazas…quasi me i meto vergonyoso de leyer-me y lo dixo estar de camín.
Manimenos no m’en foi, que dengún no me mulla a orella y campo sólo por estos camíns, asinas que tampoco voy a sincusar-me, que tampoco ye ixo en estas envueltas .Ya deciba cuan empecipié o blog que a mia enchaquia no yera que escribir n’aragonés porque asinas me petaba, sin pretender brenca más que no ixo. Ta par d’alavez,  mesmo como agora,  se trata de un blog personal sin guaire vocación seriosa d’amostrar-se, como una goteta d’augua que chunto con atras miran de fer-sen  galocho.     
 Expresarse en esta luenga  ya lo veigo , a lo menos pa yo, ye un proceso d’ aprendizache y desaprendizache contino enque cal fer-se-ie por  farchar-se un modelo de consenso. Ixo no quita pon pa empecipiar a fer cosetas fendo servir l’aragonés  anque no siga aconsonante de raso con un modelo que, por atro costau, no ye encara adempribiau por totz. M’estimo  más en aprender leyendo y escribiendo que no fer cosa por miedo a enflascar-me.
Agora, que torno, china chana, a engarchar, m’estimo más de dixar estar lo feito como una “feta” dica agora y enfilar-me por un nuevo esbarre enta debant. Ixo no quita que pueda tornar a qualque poema botero a maigar-lo un poquet en este bayo de parolas. Con nuevas anviestas contino enta debant, que ya sabetz que se fa camin al andar.
 Pos ixo…a petenar , u a dondiar …ta do? T’an os prexinallos m’enfilen.

A veyer  si puedo apatrusquiar una miajeta tot esto…y ya me perdonaretz cuan  m’entivoque.

lunes, 21 de septiembre de 2015

COU nocturno.


Resultado de imagen de clases de noche
Asperando á la mia filla á la salida d’o instituto,
en a mesma puerta an que allora tamién yo saliba,
barafundiando he tornau  ta ixa mesa que alavez
 compartíbanos…
Remerando, miaquemexio porqué, quan bi yéranos
bien chuntetes posaus en clase de COU nocturno,
estiranzando lo día baxo refitoleras lunas de fluorescentz. 

En do yeras  Elena ? En que rimallo de mi vida te’n fués a chitar?
En que escondrillo fosco y silencioso t’amagabas a la usma?
En l’esmo , en o peito… astí an se clava con 18 anyos l’aimor?
Qué cosa que, aquera que estiés, bien cuchiflita campa hue en yo?

Bien espericueta y pincha, mesmo como antismás, encara t'alzo,
con a riseta purniando-te en os guellos, tu responsabilidat azul,
tus manetas de monyaquet de goma, y tu pantalón vaquero no guaire
esgastau… que bien que t’aponderaba…que repolida sin saber-ne.
Te quereba u deseyaba talment más que no m’alcuerdo ?
 Quanto de tu he trafegau? Que remane en mi de aquel que bi estié ?

 Dimpués de güeito horas de petenar, cansos de tantas cosas
un día par d’atro acudíbanos a clase a que nos ensenyaran
 cosas que, manimenos, yo ya no guaire me’n  alcuerdo…
Sólo que una güembra de tus caderas y o  d’brilo os tuyos guellos
son o sinyal d’ ixas embueltas.
De  tantismos días de acero, oficina y aspras nueitz de pizarra
 garra memoria hue me’n queda como a d’ixa zagaleta que
 s’arregiba con as mias comedias engalzando a pachas lo tedio.


Ixo cal que sigan os nuestros trunfos furtaus á o tiempo…
Croxirar as cercanías y dixarlas asinas… a salvo de la intemperie
en o cubilar d’as remeranzas.
Ixo Elena, estoi que ye matar o tiempo… ficar as mans en l’airera
que de camín se’n va y agarrapizar prexins y reyalidatz  que nos
soxeten  firme cuentra l'empente d'o cierzo.

Emplir-nos de armonías, anque siga mallar en fierro fredo. 

sábado, 12 de septiembre de 2015

VIN Y VERSO

Resultado de imagen de TONELES VIEJOS
D’ixo fa a-sabe-las  nuietz,
más que no m’entrefilaba,
que m’en puye meyo zorro
d’ixa amagata bodegeta
do lo tiempo bien largo s’acofla
gosando dixar-ie su poso de robín,
bafadas que transtornan lo cutiano
y royas alufras de nuevas  plenitutz.

Hue , o sol en mingua d’agüerro,
trepuzando al tentón i torno a baxar-ne…
y acucuto en un leco de negros silencios
que siento botiando en un laberinto de
 mirallos d’o revés…ye un barrunte de tierra,
 l’azogue encadau que me engalza cerrín
 asperando-me  asti baxo…..y  ye que abocinau t’allí marcho.
Por fer ta un costau ixa fosca fredor, talment croxide
iste tonel de luz, an que’n dentra tamién d’atros á espuertas…

Cal encender ixa sondormida bombilleta,
feble garrampa de inspiración, como un
moriciego  en a suya güembra espiguardau,
a veyer si esvolastriando me ilumina l’esmo…
y  trigo a clau buena, cepreno, empento, y ya i soi…


Cuenta tu tot o que coge iste peito :
o mor mor d’a quera… siente…
rancias esencias
enluzernadas barucas
empolvadas querenzias
trates aconortaus como caitos d’o cielo
esviellatos prexins
cestons a rebutir de vacíos
ceringallos pa banderetas y fer-te-ne fiestas.

Masiau que si, voi a uscar-ie rampallos de luz,
 uga cojón de gato entreverada de suenios y feitos,
y  ubrir con prou tiento as xetas de senera,
espirallar os espritos libres sin guaire prisa…
y catar si soi rancio, picau,  u pitarra…
puestar que siga aceto u farto de zarampancas…
pero si m’amanas o tuyo poziello t’ itaré un dedet
 d’iste vin de casa nuestra y madre viella, amerau d’aconorto.

Arabá que siga un gran vin iste que acubila o mio peito,
á lo menos á yo me ferá buena honra pa beber-ne á traguetz , espaciet,
en istas nueitz an que cuasi me pienso que apercazo un piacet d’o tiempo ...   
(U a una mala, si se m’estraga, lo dixaré estar, que ferá buena vez en bel guiso con tremoncillo).
Ita-te-ne firmes tragos, yes convidau,   anque cal  que lo trobes bel poquet aspro.

Dimpues, si te fa goyo, nos encubamos atra beroya cosecha de nuevos suenios.