19/1/14

Tucas.







Mirando de apercazar l´aroma d´as tuyas bisas
enta o zielo d´a tuya boca,
en tu me prexino aszendendo-te ne.

Crebantando esteparias ambiestas
ta l´altar misterioso d´os tuyos guellos
tot de tu, sin de remeyo, me´n leba.

As mans d´os mios labios, os labios d´as mias mans
mormostiando-te febles bayos por pretas endrezeras
en a tuya piel inapercazable, sin tornada, sisquiá se trafegasen.

Barranadura de birabolas estiera o mio deseyo,
por tú, garona gorgollosa o mio pulso, entre garmos
de culpa esturruzando-se ne libre ent´o bazio.

Al tentón entre as boiras pretas de un deseyo meco,
esnabeso o silenzio tobo d´os tuyos camins.

A pintacodas t´abaxo con o zereño empuxe de una

esgallata delera, me prexino un tortular de lirios
en as tuyas ancas…
Y de o tuyo cuerpo de molsa y nieu pintorrotio conzietos
amagaus en os mios paisaches…
No están que buedos prexins, garra periglo m´engalza.

Tu, indiferén y fachendosa
en a tuya calmuda grandaria,
entre as tuyas nesgas m´amagas
calidas aldas con que soniar,
as densidás fredas y azulencas
de no poder aimar sin de mugas
a tuya rasmia y polideza zanzera.

Chitau chunto a os tuyos pies, fiyel ta o pulso d´os suyos días,
ye o mio corazón, laminándo-se con triste argüello as suyas
pautadas nafras, renunzias ubiertas, zarquinazos de cuentraluz…
en o suyo soniar, cuentra o tuyo peito de diosa.

Ye l´ aconorto que imos adempribiando, a retepelo,
en istas embueltas d´agüerro.
 

7/1/14

Biellos papels.





Tasamén sin de querer-lo los n´alzo

como legajos de pleitos xublidatos,

zereños con a suya gometa nugaus

enristindo chuntos a lochica d´o tiempo.



Parixen creyer aber-sen merexiu o dreito

de zurziquiar-me con chantajes d´antismás,

no son que papels que como rametas de buxo

fue dixando, ta tornar sin trafegar-me, en o mio camín.



Cartas, poemas, fuellas an se cuaternan marcas en

corridas populars...tobos retratos que güe fan azeto

lo romanziar d´os mios mirallos , pansos mensaches

que dende aquel tiempo ta yo mesmo me´n nimbié, d´ixe

que ta par d´alabez yera parando as mugas enta un

esdebenidero sin de foscas zarampancas.



Leyer de nuebas istas cartas ye como fer ascuitetes

d´o que bi estié, alparziar, foziar en a tasca zanzera

d´os enluzernans puertos d´a chubentú, agüaitar

amagato dezaga d´o presén as estelas que ya tornaron

a estar mar... atamás d´ellas ta qui en arriban polidas

grilladuras cuentra foscos prenosticos.



Güe me´n gritan un desbiellato deseyo de inozenzia

e espirucueta rebeldía, acotrazian nuebas alas batendo

enta días zanzeros cuasi sin de ayere, no en baldes fa

ya trenta añadas que en a tapa metié "Carpeta de mai cal xublidar", malmeter-nos tobamén no yera o aprebenito....

Biellos papels que m´endizcan dende o mio tiempo que ta qui m´en traye.

5/1/14

Mariner de boira preta.








Semblebas a tuya maleta plena á caramuello
en a tuya piel de chobenastro, ta par d´alabez,
cuan a medrana airiaba o bayo de l´aconorto
malas que sapiés que luego aberbas de zarpar-ne.
Caleba siguir-ne as estelas d´otris que a l´arreu
baxaban t´atros xutos puertos arribar…
Bicos por fecundar tos asperaban angluziosos
ubiertos bataleros a deleras doradas, un 5ºB an
ferretiar zanzeros azeros enta un millor amprau esdebenir.
A o escomenzipio d´o nuebo tiempo
tot rechitaba de bez chocante y furo,
pespeutibas, espazios, ambiestas,
sonius, güelladas, parolas…
Zaragoza no yera que a suya
freda espalda ¿Do lo suyo afalago?
allí teniés que fer d´un naufragio
un suenio por encorrer-lo ne, y fues fendo-ie
de tú o mudéjar, os bagos, mesmo a tuya vida.
Pero como ebas á xublidar o tuyo
lugar tan perén de tu ?
Como dixar sisquiá bellacosa
d´ ixos os tuyos días de buxo?
T´esmicazas-te a siñalíns pa fer-ne
simién en as tuyas glarimas,
glarimas t´abonar en l´asfalto buen
tempero, simién aguardando-te rechitando…
no yeras que un grumete y ya sapebas
esfer os ñudos nugaus en a gargamela.
Por as carreras d´a mar resalada d´o zierzo
nabatiabas enta l´orizón perén ta debán,
terne que terne, salitre y flor… marchar, tornar,
y buelta ent´os quefers á marchar…gosabas dixar
dezaga d´os mallos amagata a tuya isla , á o canto
-Astí firme anugata- d´o Galligo, margín d´entibo,
archipielago de lugars, ronals, pardinas y corrals,
inespunable altero castiello an no guaire reblar,
paisaches d´a tuya alma, berda pirinenca mar…
Mesmo que un belero en Monegros yeras 0 un albatro
de salón si no podebas tornar…anque tu l´alma no la
te mirases de trobar en a bal ampla e desinforme d´a mar.

Si os besos estasen libres.






O beso en o suyo silenzio ye poema perfeuto
libre espresión exauta en a suya chusta mida,
enzertata sintesis d´o dito o encara por dizir-ne,
ni brenca por demás ni pón manca en ista simbiosis d´o nusatros.

Beso soniau.
O mio beso soniau tien a densidá, o zerclo,
o buen prebo d´os tuyos labios, en ers os mios
besos rechitarban o esclatarban como flors y fuens
de puerto, dende ers aletellos de chiquinas birabolas
mos esnabesarban goyosos, por ers suenio, petalos
blangos y royos, a tuya deseyada boca no apercazada.

Primer beso.
Sobre dos lurdas risetas que se i troban, o desafio de
dos enzertadas güelladas, una zaguera buega se restriñe astí,
an agora ya no s´amenistan as parolas, beso terne balla d´alacordanza,
perén curto malas que remata , primer de toz…primer de tot..
rebutiens de bazios e machicas garrampas que surten d´as polpetas
d´os labios.

 
Beso pasión.
Motolón de deseyo liberato ubriendo-nos bataleros
sin de contumanzias, lubrica lifara de almas barrenatas
son os nuestros cuerpos enreligaus, ni perreque d´o mio
deseyo que zaga de tu t´engalza en o beso se redama,
luita de pasions improlagables do ya sólo que´n puedo
estar en tu, pa tu.

Beso cutiano.
Cosa eslampa de tu en a trobada d´os labios cutianos,
siembra de lebes besos pa que en os tuyos días en baigan
grillando, besos d´a casa nuestra, feitos d´o aire d´un sospiro
sobre a piel cutiana, a millor parola no nunca dita,
morisqueta esenzial d´o tiempo nuestro.

Beso enarcau
Si estasen libres, si no fesen mal, si os mios besos no
tenesen de cotos, si podese estar que estiesen sólo feitos
que de luz sin de güembras, tantos t´en darerba que o tiempo
d´a inozencia a la fín ta yo tornarba, tiempo ta emplenar
a embute as tuyas mans con o traquitiar d´o mio corazón.

Paradisos de esenzias s´amagan dezaga d´os tuyos labios,
terciopelo y seda clamando-me ta la bida perén desbiellata,
si quererbas lebar-me ne allí esbolastriando agafato d´os
mios labios, si te aganarba aplénar-me de aimor crebando-me
os dandalos...si asinas debán d´os tuyos labios m´en trobar-se..
no se me… miaquemexió o que ferba.

A tuya risa.







A risa tuya ye a millor letra escrita
en a mosica d´os tuyos güellos,
tremola libre en a careta de tu zilebrando
a fiesta de fito-fito mirar-nos,
 en ella acucutas piulando con goyosa
rasmia ta escampar as güembras,
en ella se troban os sospiros d´as
caracolas y os berdes d´a molsa,
en ella puyas batendo alas dica os
labios dende a paloma d´o tuyo peito. 

Yes tú rezentándo-te-ne en a tuya más
sinzera canta dillá d´as parolas, ye a risa
de tú o trunfo d´o berso amagato y contino
que remane en tu, a solana d´os tuyos mundos
brilando-te-ne a embute en a boca, bi ye fiesta
libertaria por a tuya luita sueniada de bitorias
contra o fastio, ye a tuya risa o mio millor paisache
pa nueis templadas d´as tuyas tobas armonías. 

Porque en ella t´amuestras, te debantas, te concaras,
benzes, contaxias y aimas, porque cuan t´arregues
ye a tuya boca clamor de lunas y fuens misteriosas,
porque ye en o suyo tinglar de augua do podemos
espullar l´alma dica trobar-nos, porque esisten as
glarimas estiemos agora a remor eferbescente
d´o sobater-sen d´as espigas…arregui-te de yo que no ye
que a tuya risa o que me fa bulcar os limites e  silenzios. 

Dixa que desfrute d´o trunfo d´a tuya carcallada
dixa que o mio peito s´emplene a gargalé d´as tuyas brisas
dixa-me fer-te onra con as mias sanseladas de payaso,
dixa que beba a remor d´as tuyas fundas auguas crebando o silenzio
dixa, a la fín, que me salbe en o bin compartíu d´o nuestro goyo.


Paisaches.





L´augua m´enluzerna con o suyo relumbror

as estrelas me cucan guellos en feble tortular

o bazío m´amuestra un perigloso bertigo afalagador.
 

Tot ixo ye en a purna d´a tuya cucuqueta

que me trespasa de cuairón,

en o paisache fundo d´os tuyos güellos

an perén a bida bi m´enarca…

cuan l´agulla d´a tuya riseta me

se´n fica en mello mello lo corazón.

 

O pai de yo.






Querese dar-te un nuebo inzierto esdebenir

ofrexer-te toz os amanexers encara por arribar

tornar-te lo zereño d´o tuyo primer paisache

esbiellar o brazo que ferró libre o destino de tu

e que aconortes as tuyas renunzias e fastios,

querese que no fe-sen ni tartir os tuyos mirallos

e que ni perreque alticalme a feble tuya güellada.


Reconoxco a tuya rasmia d´antis en o dandaliar d´as

tuyas garradas, en as tuyas tremolosas mans

o treballo feito de buena traza, en os tuyos cansos

güellos os brilos de buena cosa de d´ambiestas,

en as tuyas parolas tan de tu l´amor por l´aire escribiu,

a bida en tu s´en cala e aguarda con unatra rasmia

pero en ye a mesma garrampa d´o tuyo aquel primer inte.


Atamás d´a terneza de nino que remane en tú

chugarebas á medranas e goyosas inconzienzias,

combollando l´esmo enta una zaguera dinidat,

tramenas terne que terne os corredors d´os remeros

pa aturar-ie en as cambras do l´amor gosa salbar-nos,

reniegas d´a tuya biellera e continas enta la luz d´o camín,

luengas te se fan as nuies ent´o día an tornar terne a renaxer.


O cuerpo de tu, amolau por a sana costumbre de bibir,

planta firme en o argüello d´as tuyas ya amplas camisas,

e yo no´n quiero beyer-ie bazíos, tasamén, alcaso, bel recosiro...

beigo en tu a senzillez que me clamó ta iste mundo de bidas

pa capir l´orden d´as cosas e acotraziar bellas reyalidats,

y astí, an o tiempo por o pribilechio d´os tuyos días t´encarraña,

me acullo en a man de tu an coba l´insondable misterio d´a vida.
































Ranas y zapos de bago.






Atalaya d´o tiempo ye a mia finestra
astí an a ziudat se fa margín y buega
tasamén an se fan mecas as suyas campanas.

Acucutando-ie me remero de nanas de grichas
imensidat de cantos amagaus y cuculos entutatos,
días con a luz d´as espigas , nueis sandalo e plata.

Agora os días, retunos, m´engalzan a redol, entre
grandizas ballas que aponderan a balgua d´o espazio
e as estrelas que se trestallan alzatas en bitrina de diamantes.

Un bombolonello azeto e esmolau puya cuallando amarillenco
l ´aire, ye o silenzio d´a nuei fendo-ne percutireras las remors
de industrias enamplando o suyo tañer de limpio ferrunchoniar.

Con tot y con ixo un misterioso rimallo de umedá i remane,
barrenatas chilan, granotas enrestidas, a suya canta libre e berda
croan encara dende a suya zaguera ribera de chuncos enrobinaus.
Cada nuei lo´n fan asinas, baxo chiquinas aironabes
rumbo enta París, como abetes arrepinchaus en as rallas,
como a grama en a crepa d´ormigón…sólo i son que bida
fendo-ne un poder por amostrar o suyo trunfo perén.
Estrapaluzio ye a nuei, cantar-la-me,
que de busatras ye a nuei d´iste fosco margín.






Sobrepuerto.











Enarcaste á o tuyo paisache tallando

un orden anzestral de piedras sin de fín.

Amansés un mundo á las tuyas midas

que cogeba o esdebenir á pacha con toz.


Tosca sintindo baxo a chaminera as parolas

dende luengas y flamas de un mesmo fuego.

Losas adrezando rafes d´eras, puntillas de saya

do zilebrar os conqueraus goyos d´a primabera.


Naxiste d´o argüello d`os ganaus menaus

marchando a l´arreu sin fín enta tierra baxa.

Entre mugas de molsa atlántica e piedras de calibo

an te´n dizieron o tuyo nombre de casa con nombre.


Carne d´iste cobalto yeras, beroyo e furo de bez.