Parolas

Manullo de parolas aragonesas

encara güe en a falsa de casa nuestra,

parolas de molsa en solanos tasamén

endurando-ie en feble remanir,

en a maleta de pai con as suyas alufras

fa cuasi una bida se i ficón,

dezaga de cantas de sirenas á conduta

con él á fer-se o pre i baxón,

dica istas mugas dillá d´Aragón

fa muito tiempo amagatas en plegón.

Parolas que güe como bombolletas

en l´aire tremolan a embute plenas

de un tibio alentar que quedo las empenta,

tramenan febles concarando ista firme zierzera

dica en silenzio esclatar-sen, y terne que terne tornar,

y asinas, en as nuestras mans, resistindo-ne perén i son.

Parolas como as remors de rezials en foscas gorgas,

como soníu de chera an i petan fuellas berdas de buxicallo,

como lo silenzio griso que en as enruenas cuan i plebe se posa,

como bin a gargalé en lugars plenos de purnas en as ninetas,

birabolas batendo alas dillá os puertos dica capuzar-sen en a mar.

Gurrions de bico acubillatos en plazas, margins y rafes

fendo-ie niedos de brozas clandestinas y papels de lamins,

parolas mil begadas chipias en tronadas sin esconchurar,

esbolastriando entalto dende o esclatar de gargamelas urbanas

cuentra tanta anguzia enrestindo tot o que no en tien garra pre.

De un aspro tronco as berdas parolas acucutan e á l´airaz

d´Abril tornan, como pétalos de flors d´almendrera tortulan

e se dixan lebar… fuellas, flors, frutos y simiéns alzadas

en o nuestro implaz contra lo tiempo, sintindo-bos me prexino

en esdebenideros amplos de feners sin de margins.

A ta más d´a aduya d´iste buedo agüerro an agora acotolatas

e xublidatas chacerbaz ya?

Chitos de luz de biellas primaberas por o tiempo t´aqui tornan,

chitan enrestindo a rabior d´o fastio de un carrilano ibierno

ta amostrar-nos o camín que imos fendo enta cobaltos de dibersidat.

En a mia luenga y boz comboyar-tos me´n cuacarba,

en a mia luenga prendez cuentra o azeto robín d´os silenzios,

a mia luenga endizcar t´alzar isto que le´n dizimos dinnidat,

meter-me en cantareta pa fer colada e sacar-bos as largardas

de solimán que un mostrugo de zien capezas tos chapurnió.
.