5/1/14

Puen engaronau d´a Gorgacha. Entibo d´A Peña.




Te debantón pa cutio estar firme trampo


entre esbarres y camíns, entre peñas e tozals

ubrioron os tuyos zelestes güellos bataleros,

prebando de fer-te perén acarrazo de rallas

sobre o Galligo te i ficón, sobre os zaguers

gorgollos encalabrinaus marchardo-ie enta

mallos y llanos.

Astí yeras, piedra, aire y río, arrenpinchau

amanando pirinencos Reinos, paso zeleste pa

tramenar de chens, trinos, d´as cantas libres d´o Galligo.

Agora penas ya un ziento d´añadas engarcholato

por as auguas d´otris, baxo una napa queda d´un

mar pirinenco que dica o fundo te´n capuzó

ta un fundo de peñas enarcatas feitas grisos corals

de calzina angunia, enzerrine de piedras bi yes por

alzar l´abantarosa fachenda d´o primer día.

Tasamén aconortato entre as mesmas auguas

que baxo os tuyos güellos estioron río, ya no

sapes si talmén sólo bi yes que laminato canto

de glera que l´agua empenta.

Embalsamato de olbidos con bardos de

soledat chipios de silenzios, sin de biellos

camins ni estelas eslambiatas en o tuyo zielo

capuziato, en o fundo d´a Gorgocha achuntando

por demás dos afogadas riberas, en o chipichape

ficato de una placha de tarquíns, tanimientres se´n

quera o tuyo zerrín esquinazo.

Ni brenca ni meya astí indica o puesto d´o tuyo argüello

e tiempo no guaire remerato, ni una sayeta cara ta baxo

enta res metendo-ie o tuyo nombre cuasi tresbatito.

Acucuta de nuebas zereño y espeutral sobre o tuyo feble

río sulsíu, naufrago d´o tiempo ixuga os tuyos treballaus

güesos á la sequera del´estíu, e malas no bi aiga augua

que dixar marchar e t´esterreñes d´as zagueras nieus,

amostra-mos te como una culpa pa que penemos

o tuyo chopizo desamparo.

Beluns romanziarán o tuyo esdebenidero reblar como

un natural beredito d´o tiempo, atamás d´ers unatra

begada no serebas paisache, pero asti bi yes, enguiliando ibiernos.


Baxo istas auguas d´o Galligo aquí de nuebas aturadas

sin sisquiá ni tartir, escansa á o silenzio d´a Istoria mesmo

que de tantismas d´as nuestras istorias, un puen meyebal

an auguas y chens yeran bida fendo cadagún o suyo camín,

con tu dixo istas parolas como bolandrinas o carpuzes u





zapos ta dizir que astí bi yes.


Llano de grano y polbo, de panizo berde, asfaltes,

zequias y hortals, indiferén á o fundo craquelato d´os

tuyos montarazes mares d´o norte.

No hay comentarios:

Publicar un comentario